Innri-Mongólía hefur verið sjálfstjórnarhérað síðan 1947.  Þar búa u.þ.b. 20 milljónir manna en þar af eru aðeins 10% mongólar.  Landið er risastórt, breitt og langt, nyrzt í Kínverska alþýðulýðveldinu.  Landamærin til suðurs ráðast að mestu af Kínverska múrnum og í norðri liggja þau að alþýðulýðveldinu Ytri-Mongólíu. 

Þegar á tímum kínversku Mandshukeisaranna var lögð áherzla á flutning kínverja til búsetu í Innri-Mongólíu.  Japanar lögðu landið undir sig árið 1931 en það komst afur undir kínversk yfirráð eftir síðari heimsstyrjöldina.

Stór hluti landsins er steppur og eyðimerkur (Góbí með fyrstu eldflaugastöðinni, Ordos).  Helmingur landsins er beitiland (sauðfé og geitur). 

Dalur Gulafljóts (Hwangho, Huang He) er frjósamur og þar stunda aðallega aðfluttir kínverjar landbúnað.  Í Mongólíu ríkir hreint meginlandsloftslag með ísköldum vetrum.  Heitustu og úrkomusömustu mánuðirnir eru júlí og ágúst.

Mongólsk matreiðsla byggist aðallega á kindakjöti.  Kássa úr kindakjöti (Shuayangrou) er vinsæll réttur í öllu Kínaveldi.

Hohhot (Hohehot, Huhehot; mongólska = Bláa borgin), höfuðborg Innri-Mongólíu, er í 400 km fjarlægð í loftlínu vnv. Beijing við jaðar mongólska graslandsins, mikilvægasta kvikfjárræktarsvæðis Kína.  Skoðunarverðustu staðir borgarinnar eru:  Gamli miðbærinn með mosku og Trumbuturni, Mongólska þjóðminjasafnið, Fimmpagóduhofið Wuta Si (18.öld), lamahofið Xilitu Zhao (frá Qing-tímanum) og hin rúmlega 40 m háa pagóda Wanbu Huayanjing (u.þ.b. 1000).

Tæplega 10 km sunnan og utan borgar er haugur Wang Zhaojun, hjákonu eins Hankeisaranna, sem komst á spjöld sögunnar vegna þess að hún var þvinguð til hjónabands við einn hinna húnversku sigurvegara árið 33 f.Kr.

Það er gott að nota Hohhot sem áningarstað, sé ætlunin að heimsækja kvikfjárræktarsvæðin í Da Mao.  Oftast er gist í hirðingjatjöldum og hægt er að fylgjast með hirðingu kameldýra, hesta, nautgripa, geita og sauðfjár eða skrautlegum reiðlistum. Uppi í sveit rekst fólk við og við á lamaklaustur, sem eru í örgustu vanhirðu.

Baotou (Pautou, Paotow, 1,5 millj. íb.) er mikilvægasta iðnaðarborgin (stálver) í Innri-Mongólíu.  Hún er 150 km vestan Hohhot í 1700 m hæð yfir sjó.  Í grennd við hana er grafhýsi Dshingis Kahn (†1227).

Duolun (Tolun) er 430 km norðaustan Hohhot og 270 km norðan Beijing.  Bezt er að komast þangað landleiðina frá Chengde.  Borgin er álitin vera fyrirmyndin að 'Xanadu', hinum dularfulla bústað mongólafurstans Kublai Khan (barnabarns Dshingis Khan), sem sigraði Sungættina árið 1229 og Yuanættin (til 1368) stofnaði.