Angmassalik er stærsti bærinn á Austurströndinni með u.þ.b. 1.500 íbúa.  Lega bæjarins er mjög fögur við skjólgóðan fjörð, umkringdan háum fjöllum.  Á, sem rennur niður Blómadalinn, skiptir bænum í tvennt.  Náttúruunnendur fá sér göngutúr um Blómadalinn til að kynnast einstakri heimskautaflórunni.  Á hæsta stað í bænum er varða, sem hlaðin var til að minnast 50 ára afmælis hans árið 1944.  Þaðan er ágætt útsýni yfir bæinn og umhverfið.  Eins og í öðrum grænlenzkum bæjum og þorpum eru marglit timburhús áberandi í Ammassalik.  Það er algengt, að margar kynslóðir búi undir sama þaki og sleðahundarnir séu bundnir fyrir utan.  Meðal stærstu bygginga staðarins eru sjúkrahúsið og ráðhúsið.  Grænlenzka frímerkjasafnið er í miðjum bænum.  Það er orðinn veigamikill þáttur í bæjarlífinu og þar er allmargt starfsfólk.  Átthyrnda kirkjan var byggð árið 1985.  Grænlenzki listamaðurinn Aka Høegh skreytti veggi hennar, loft og altari.

Gráturnar eru klæddar selskinni og konur skreyttu þær grænlenzkum myndum.  Fyrsta kirkja bæjarins frá 1908 stendur hátt yfir höfninni.  Hún var endurbyggð og lagfærð af mikilli vandvirkni og á safn sögulegra minja frá fortíð til nútíma.  Á leiðinni milli verzlunar og hafnar er upplýsingaskrifstofa ferðamála.  Í sama húsi er ferðaskrifstofa og minjagripaverzlun, sem selur handgerða muni.

Angmassalik er vinabær Kópavogs.